Brukarportalen for sentral godkjenning

Sentral godkjenning er ei frivillig kvalitetsordning som viser at føretaket oppfyller krava til faglege kvalifikasjonar, kvalitetssikringsrutinar og seriøsitet i Byggesaksforskrifta (SAK10).

Søk om sentral godkjenning

Nederst på denne sida kan du logge inn for å søkje om sentral godkjenning eller ettersende vedlegg i samband med søknad. I tabellen nedanfor kan du lese meir om kva du treng til søknaden.

Endringar i fagleg leiing

Du kan sende oss informasjon om endringar i fagleg leiing som kan ha betydning for noverande godkjenning til [email protected]. Dersom de treng å utvide godkjenninga dykkar, kan de lese meir nedanfor om å søkje om endring.

Fornying og endring av sentral godkjenning

Om du ønskjer å fornye den sentrale godkjenninga, må du søkje innan utløpet av godkjenningsperioden og dokumentere at føretaket tilfredsstiller dei gjeldande krava i SAK10.

For å utvide godkjenninga med fleire godkjenningsområde eller tiltaksklassar innanfor den eksisterande godkjenningsperioden, kan du søkje om endring.

Undereiningar kan òg søkje om sentral godkjenning

Du kan søkje om sentral godkjenning på både undereining og hovudeining. Dersom føretaket ditt er delt opp geografisk i ulike avdelingar, kan de få registrert den enkelte avdelinga som undereining med eige organisasjonsnummer i Føretaksregisteret. Om du skal søkje på ei undereining, må den faglege leiinga som oppfyller krava til utdanning og praksis vere fast tilsett i den aktuelle undereininga.

De kan lese meir om overføring av sentral godkjenning frå hovudeining til undereining nedanfor.

Overføring av sentral godkjenning

Om føretaket ditt har sentral godkjenning og skal endre organisasjonsnummer, eller ønskjer å overføre godkjenning frå hovudeining til undereining, kan du søkje om å overføre godkjenninga etter nærare bestemte vilkår. Her kan du lese meir om overføring av sentral godkjenning.

Kva du må dokumentere i søknaden

Dette må du dokumentere:

Utdanning i form av vitnemål, fag-/sveinebrev, meisterbrev eller anna dokumentasjon som viser at føretaket har fagleg leiing med relevant utdanning på rett nivå. Her kan du lese meir om dokumentasjon av utanlandsk utdanning.
Referanseprosjekt som beskriv kva føretaket har gjort, eller erfaringa den faglege leiaren har med inn i føretaket ditt. Fagleg leiing må ha relevant og oppdatert praksis innan godkjenningsområdet det blir søkt om og nødvendig praksislengde.
Fast tilsetjing for den faglege leiinga i føretaket ditt, til dømes i form av skriftleg arbeidsavtale.
Organisasjonsplan som viser ansvars- og myndighetsfordeling i føretaket ditt.
Eventuell dokumentasjon på unntak frå registrering i Meirverdiavgiftsregisteret.

Dette må du stadfeste at føretaket ditt oppfyller:

Krava til helse, miljø og sikkerheit i internkontrollforskrifta.
Krava til kvalitetssikringsrutinar for oppfylling av plan- og bygningslova.

Dette er valfritt:

Du kan sende inn dokumentasjon som viser at føretaket ditt har yrkesskadeforsikring og ansvarsforsikring.
Informasjon om at føretaket eventuelt er godkjent opplæringsbedrift blir henta automatisk frå www.finnlaerebedrift.no.

Godkjenninga si varigheit og opplysningsplikt

Godkjenninga blir gitt for tre år av gangen. Føretaket pliktar å melde ifrå om endringar som har betydning for godkjenninga. Dette kan til dømes vere omorganisering, tvangsavvikling eller konkursbehandling, eller at fagleg leiing som er lagt til grunn for godkjenninga ikkje lenger jobbar i føretaket. Send informasjon om endringane til [email protected]

Godkjenningsmerke og godkjenningsbevis

Om sentral godkjenning blir innvilga, kan du laste ned godkjenningsmerket til bruk i marknadsføringa av føretaket ditt. Du kan logge inn nedanfor og laste ned dette frå Ditt føretak. Der kan du òg laste ned godkjenningsbeviset som òg er tilgjengeleg i registeret over sentralt godkjente føretak.

Påklage vedtak

Om du er usamd i vurderinga vi har gjort, kan du klage på vedtaket du har fått. Klagefristen er tre veker. Her kan du lese meir om klagesak og klagenemnda for sentral godkjenning. Du har òg moglegheit til å søkje på nytt for å dokumentere ytterlegare opplysningar om føretaket ditt i staden for å klage på eit vedtak.

Tilsyn

Direktoratet for Byggkvalitet fører tilsyn med sentralt godkjente føretak. Dette gjer vi mellom anna for å sjekke at kvalitetssikringsrutinane til føretaket ditt er i samsvar med SAK10 og at dei er aktive i bruk, slik du stadfestar i søknaden.

Rettar i Altinn

For å søkje om sentral godkjenning på vegner av føretaket, må du ha riktige rettar i Altinn. Om du ikkje har dette frå før, kan du få det tildelt.

Slik får du nødvendige rettar i Altinn

Har du spørsmål?

Du kan lese meir om sentral godkjenning på nettsida vår.

Her finn du telefonnummer og informasjon om svarstjenesta vår.